माधव जी आफुलाई सिध्याउने दिशामा लााग्नुभयो :युवराज्ञ ज्ञवाली
सुर्खेत । नेकपा एमालेका उपाध्यक्ष एवम् कर्णाली प्रदेश संयोजक युवराज ज्ञवालीले नयाँ पार्टी खोलेर माधव नेपालले माधव नेपालले गल्ती गरेको बताएका छन् ।
उनले माधव नेपालले नयाँ दल दर्ता गरेर ठूलो गल्ती गरेको बताए ।
नेकपा एमाले कर्णाली प्रदेश कमिटिले मंगलबार बिहान वीरेन्द्रनगरमा आयोजना गरेको पत्रकार सम्मेलनमा उनले भने,‘ माधव नेपालले कुनै दिन विचार गर्नुहोला, यो कसरी जष्टिफाइ गर्नुहुन्छ, एउटै नीति, एउटै विचारधारा भएको पार्टी विभाजन गरेर यसको औचित्य पुष्टि गर्नसक्नुहुन्न ।’
साथै उनले अर्को वाममोर्चा बनाएर एमालेलाई सिध्याउन नलाग्न पनि चेतावनी दिए ।
तपाईहरूले जित्नुहुन्न, आफूले आफूलाई सिध्याउने दिशामा लाग्नुभएको छ, एमालेको मत खोसेर हामी जित्छौँ भन्ने नसोच्नुस् ,‘ उनले भने,‘ तपाईं पार्टी दर्ता गर्न जाँदै हुनुहुन्छ रे भनेर त्यही दिन बिहान मैले फोन गरेर सोध्दा उहाँले हो भन्नु भयो, मैले स्थायी कमिटिको बैठक बसाल्नुस्, त्यहाँ छलफल गरेपछि मात्रै के गर्नुपर्ने हो, जानु पर्ने हो भने जाऔंला नजानु पर्ने हो भने नजाऔंला, छलफल नै नगरेर नयाँ दल दर्ता गर्न जानु भनेको इतिहासमै ठूलो गल्ती हुन्छ ।
संस्थागत निर्णय नगरिकन नजानुहोस् भनेको थिएँ ।’ विभाजनमा नजाने केन्द्रीय कमिटीको निर्णयविपरीत नेता नेपाल लागेको ज्ञवालीले बताए ।
‘बैठक नबसी उहाँ दल दर्ता गराउन जाँदा खेरि उहाँले छोडेको भयो कि हामीले छोडेको भयो ? तथ्यले के भन्छ ? मलाई छोडेर जानुभयो भनेर हामीलाई आरोप लगाउनु भएको छ, बैठकमा छलफल नै नगरिकन दल दर्ता गर्न जाने ?’, उनको प्रश्न थियो ।
माधव नेपाल सहितको एमाले एकता गर्ने प्रयास गरे पनि नेपालले ओलीसँग मिलेर बस्न नचाहेको ज्ञवालीको टिप्पणी थियो । एमाले फुटाउनमा सभामुख अग्निप्रसाद सापकोटाले भूमिका खेलेको आरोप लगाउँदै उनले त्यसको सधैँ प्रतिरोध गर्ने बताए ।
